كرسى الاعتراف !!!!!!

وانا مش هقدر افرض رايى عليكم لان مبدا الشورى اساس الامة الاسلامية وبعدين مني اختنا كلنا

اسمحيلي اكون اول من يسالك وبكتفي بسوال واحد دلوقتي


ايه هي الحياة بالنسبة ليكي

اولا بشكركم جميعا وعلى رأس المجموعة
اخى الفاضل الاستاذ بدر
الاختيتن الحبيبتين فراشة وبشوشة
اخى العزيز سيزر
واخى الفاضل همس

على ترشيحى على كرسى الاعتراف وانا اسفة لانى فعلا مش متابعة الاحداث ومشاركاتى محدودة بعض الشئ بس ياريت الجميع يلتمس لى العذر الايام دى .
وححاول أن شاء الله تكون اجاباتى تخرج فعلا مايدور بداخلى وكمان ترضى جميع الافراد ويارب ماكنش ضيفة تقيلة على اى شخص وخاصة من اشتدد نقاشى معهم فى الفترات السابقة

همس القيثارة كتب:

اسمحيلي اكون اول من يسالك وبكتفي بسوال واحد دلوقتي


ايه هي الحياة بالنسبة ليكي

بشكرك اخى العزيز همس الفيتارة على الاقلال من عدد الاسئلة بس سؤالك بجد يشمل كل التساؤلات اللى ممكن احد سسأل عنها
هو ده اللى بيقولوا عليه السهل الممتنع
ايه هى الحياة بالنسبة لى !!
الكل شايف ان الحياه هى نتعلم تعليم كويس نعيش فى مستوى مادى مرتفع يكون عندنا الذرية الحسنة (المال والبنون زينة الحياة الدنيا ) لكن ازاى نعيش الحياه بتختلف منظورها من شخص الى اخر معظم الناس ترى ان الحياة لكى تستطيع التعايش بها يجب ان تكون المادة هى اساسها وبدونها لاتستطيع معايشة امورك ا بغض النظر كيف ومتى تتحقق من انك اصلا تحيا سعيد ام لا الاهم ان يكون لديك مايجعلك تحيا.
انا بقى احب احيا حياه خاليه من المشاكل من الاحقاد من الكرهية اشعر انى احب من حولى وايضا ابادلهم نفس الشعور يعنى اعيش سعيدة ولونظرنا الى نفسنا حنرى ان نص حياتنا ذهبت فى الاحزان فى الزعل فى الخصام اكثر من كونها تسير فى اتجاه الافراح
بأختصار لكى تحيا حياة حقيقية اجعلها حياة سلسة بسيطة خالية من القيود واذا لم تستطيع فأنك مجرد اداة مستخدمة لادارة عجلة الحياة وغيرك هو من يعيش علىها.

وسع وسع انتى وهوه
ايه
مفيش هنا حد غيركم
وبعدين ست الكل ملاك الرحمه على الكرسى وفيش حد منكم عنده شويه من الاحمر
تلاقى الست عندها هبوط
مفيش لها شويه بسكويت
ايه الجليطه دى
اقعدى على السزلونج وريحى خالص
وراجعلك
الله يرحمك يا ملاك الرحمه
قال بسكويت قال
هههههههههههه

حبيت اقولك اهلابيكى على كرسى الاعتراف

وربنا يقويكى ملاك ولى عوده مره اخرى

اهلا اخت ملاك الرحمه
انا موش عارف حاجه عن رجوعك
ولاكن اهلا بيكى على الكرسى
ولكن لى ربنا معاكى انا منتظر دورى اسأل

محمد على كتب:

وسع وسع انتى وهوه
ايه
مفيش هنا حد غيركم
وبعدين ست الكل ملاك الرحمه على الكرسى وفيش حد منكم عنده شويه من الاحمر
تلاقى الست عندها هبوط
مفيش لها شويه بسكويت
ايه الجليطه دى
اقعدى على السزلونج وريحى خالص
وراجعلك
الله يرحمك يا ملاك الرحمه
قال بسكويت قال
هههههههههههه

ههههههههههههههه
هبوط من ايه ياجميل بعد الشر عليه
بس ده مايمنعش انك تجيب بسكوت وكحك وبيتفور وغريبة بس الاسم معيد وخلاص
اي نعم لسة صايمة بس ممكن بعد الفطار مش حكسفك خالص اصل الطفاسة اشكال وانا شاملة الكل هههههه
ميرسى على الشزلونج يامحمد محتاجة فعلا امدد كدة ولو نمت مش عايزة ازعاج فاهم والا افهمك
مستنياك ولما نشوف اخرتها معاك!

كاكاى كتب:

اهلا اخت ملاك الرحمه
انا موش عارف حاجه عن رجوعك
ولاكن اهلا بيكى على الكرسى
ولكن لى ربنا معاكى انا منتظر دورى اسأل

ماتخذتش فى بالك اصل انا كنت محبوسة فى الفانوس وواحد ابن حلال لاقى الفانوس فدعكة وخرجت انا علشان اقولكم شبيك لوبيك ملاك المزعجة بين ايديك
ومنتظره منك اسألتك ومن غير ماتقلق خالص

البشوشه كتب:

ربنا يجعلك حياتك كلها فرح يا عاليا ان شاء الله

ربنا يخليكى ياحبيبتى ومايحرمنى منك ابدا وبرضة يهنيكى فى حياتك ووسط عائلتك.

اسمحيلى انا بقى اسالك

اؤمر ياقمر


اولا انتى نسيتى شروط الجلوس على الكرسى بس ولا يهمك وهى

اسفة والله بجد لان لى فترة مش متابعة معاكم بس حرمت ياابله ومش حعمل كدة تانى
- الاسم

علياء
-المهنه

محاسبة

- الحاله الاجتماعيه

متزوجة وعندى ولد وبنت
- السن

ليه الفضايح دى (35)
- اتكلمى عن نفسك فى سطر او سطرين
انا واعوذ بالله من كلمة انا انسانة طموحة بحب كتير اكسر روتين الحياه بحب اسرتى جدا موظفة بس من منازلهم متغربة من سنين عن اهلى واصحابى اللى افتقدهم فعلا فى حياتى
الاسئله
1- اوصفلنا علاقتك باسرتك والمشاكل فيها بنسبه كام وهل انتى اكتر الاوقات بتكونى سببها ؟
بصى انتى تيجى تقضى يومين فى البيت وانتى اللى تحكمى بابنت الحلال بس احب اقولك انا بكره المشاكل جدا ولااحب اعيش او اتعايش فيها مش علشان نفسى بس كمان علشان خاطر ولادى يكونو فى جو نفسى معتدل ويبقى عندهم ثقة فى انفسهم .
2- اذكرى ميزة وعيب لكل من

يا خرابى احسن يزعلوا منى
*الاستاذ صالح حجاج
الميزة :
استاذ صالح شخصية جميلة صدره رحب ويحب النقاش وبيقف جانبك فى اى استشارة تطلبيها منه
عيبه:
لما يلاقى دماغ بتعاند قدامة بيديها على دماغها وممكن ينفعل عليها.

* الاستاذ ادمن
الميزه :
هادى الطباع حريص فى كل تحركاته جدا وكتوم لايحب ان يخسر فى اى معركة اى طرف من اطرفها
عيوبه :
بيشترى دماغه ههههههه اسفة ياريس

*عاليا

اللى هو انا
متهيألى انتم اللى تحكمو عليه وحسيب لكم الميزة واقول العيب هو انى عنيدة جدا ولاارفض الاستسلام وعاشقة للتحدى لطرف اراد ان يدخل معى فى معاملة ندية.

* البشوشه

البشوشه دى حبيبتى طبعا لانها فيها صفات كتيرة موجوده فيه بس هى بعقل اكتر ورزانه ومش بتحب تزعل حد
عيوبها بقى
لما بتدخل نقاش مع الجنس الخشن بتكون مسالمة ومش بتعرف ترد وساعات برد عنها علشان ماحدش يأخذ عليها
3-واقع انتى عيشاه ونفسك تغيريه؟

والله ماحدش راضى عن واقعة والا عن نفسة وتغير الواقع بشكل جذرى يكون خيال لكن ممكن تغير اشياء فيه تحقق لنا حياة افضل
4-تقولى لمين اشوف فيك يوم ياللى صغرت فى عنيا وتقولى لمين انا اسفه وبالاسم ؟

اشوف فيك يوم فى شخص صورنى بصورة حقيرة تعكس كرهة لى واقوله حسبنا الله ونعم الوكيل وربنا يمهل ولايهمل

وقول اسفة لأى شخص جرحتة او انفعلت عليه وبدون قصد وانا ساليمة النيه واتمنى ان يقبل اعتذارى
اما عن ذكر الاسماء لان الموضوع شامل كل البشر ومافيش حد خاص
5- ايه شعورك لما كنتى باسم منى وكنا بنذكر امامك سيرة عاليا؟

اسكتى بلاش تفكرينى بجد كنت كل يوم اتخنق عن اليوم اللى قبلة احساس الموت مؤلم وانا جربتة فى اسرتى وفعلا كان صدمة لى اكتر منكم وكنت بترحم عليها زيكم
6- اكثر عضوين قريبين منك هنا ؟

والله كلكم فى منزلة واحدة وكل عضوة او عضوة له ذكرى جميلة معايا لايمكن انساها وفعلا وبصدق انا معاكم بشعر انى وسط اهلى ويمكن اكثر.

7- اعتبرى نفسك الان دكتوره نفسيه واختارى عضو وحللى شخصيته ؟

صعبة متهيألى ممكن العضو ده يزعل بس فى انسان بأحس انه مكبر الجمجمة زى حالتى وكان دمها خفيف زمان قبل ما يجيب النونو ومن ساعتها ماحدش شاف وشه
عزب افندى
عزب من الشخصيات اللى كانت موجوده بالمنتدى بتحب التهريج والمقالب الجميلة وانا بصراحة بحب النوع ده من الناس واللى للأسف ان تصرفاتهم دى بتعكس صوره اخرى عن داخلهم وانهم من الناس الاقوياء والمتامسكة امام البشر فى تعاملاتهم ولكن مع انفسهم فى منتهى الحزن والتعاسة وماتحبش تظهر ده قدام اى حد حتى الناس اللى بتحبهم وبتحاول تساعدهم وتقف جنبهم مخ شكله صعيدى زى ناس هههههه وفرصة انى اقوله ارجع ياعزب ارجع لبيتك ولاخواتك ماما عاليا مش حتعملك حاجة وحتسامح عملتك المنيلة اللى اثرها موجود
هو فاهم وعارف قصدى


ومتشكره اوى ليكى

انا اللى متشكرة ليكى واكيد قلبت دماغك اوى اوى

شكرا علي اجابتك علي سؤالي ؟، واسالك السوال الثاني بعد اذنك



اكيد كلنا مرينا بالحب الاول وان كنت اني اعتقد ان الانسان يظل اسير الحب الاول
فياريت تحكي لنا مين هو حبك الاول وقصتك فيها يعني ازاي اتعرفتم ازاي كانت معاملاتكم ازاي سيبتم بعض وكده يعني

معلش انا اسف هقلب المواجع بس مش تزعلي مني بليز

همس القيثارة كتب:

شكرا علي اجابتك علي سؤالي ؟، واسالك السوال الثاني بعد اذنك



اكيد كلنا مرينا بالحب الاول وان كنت اني اعتقد ان الانسان يظل اسير الحب الاول
فياريت تحكي لنا مين هو حبك الاول وقصتك فيها يعني ازاي اتعرفتم ازاي كانت معاملاتكم ازاي سيبتم بعض وكده يعني

معلش انا اسف هقلب المواجع بس مش تزعلي مني بليز

هو سؤال حساس فعلا بس اعذرنى مش حقدر اجاوب عليه بكل التفاصيل حفاظا على شعورنا سويا

انسان تعرفت عليه بالصدفة بالنسبة لى ولكن اشك بالنسبة له ان كان فعلا صدفة وضعها القدر فى طريقة او صدفة مصطنعة وقصتى معه كانت خياليه واللى اكتشفت فيما بعد منه شخصيا اننى مختلفة عن الباقيات عن من دخلن قلبة وخرجوا ايضا اكتشفت انى كنت نزيلة عنده ترانزليت مش صاحبة ملك وان قلبه كبير اوى ويقدر كل يوم يسكن ضيفة جديدة به بس لازم يخلى الساكن القديم بمنتهى الذوق علشان لو حب يسكنه قلبة تانى يكون على استعدا د للرجوع من غير شروط لانه وجد حسن المعاملة والخدمة عندة والساكن دايما بيبهرة مكان الاقامة وشكلها قبل معرفة اساس السكن هو مبنى على اساس قوى والا أيل للسقوط ولكن بيكتشف الحقيقة لما بيحصل زلازل والساكن بيخلى المكان قبل مايقع به السكن او تيجى البلدية وتطرد الساكن به وبيخسر حتى متعلقاتة الشخصية.

اما عن حكاية اسيره دى تقيلة شويه لان لاشئ يجعلك أسير لاحد وخاصة تحت مسمى الحب لان معظم علاقات الحب تنتهى بالفشل وانا بطبيعتى برفض الفشل فى حياتى وبقاومة لاخر لحظة بحياتى.

اما عن المعاملة بصراحة كنا بنفهم بعض بدون كلام هو بيشعر بكل شئ داخلى وانا ايضا كنت بشعر بكل شئ داخلة وكل شئ محيط به لدرجة ان لحظة تركى له شعرت انه ليس معى وانما هناك شئ جديد بحياته او ساكنة جديده دخلت قلبه وفضلت ان اخلى مكانى قبل طردتى منه
واكيد بتمنى له سعادته مع السكن الجديد يمكن يكون ضيف بيدفع اكتر منى!

مافيش مواجع والا حاجة كلنا فى حالة سفر وترحال وكل يوم بنسكن فى مكان مختلف اما ان تقبل العيش فيه او تنقل اقامتك فى مكان اكثر راحة لك بشرط ان لاتسكن الطرقات والارصفة او تسكن بين الغابات وتلتهمك الحيوانات المفترسة

أهلا بأختنا الغالية عاليا

ملاك الرحمة حاليا

بس مش عارف ليه مع أنهم واحد أتعلقنا بعاليا لأنها عشرة (من العيش والملح مش رقم 10)

ولنا معاها مواضيع ومساهمات كتيرة

المهم أهلا بيكى على الكرسى وماشاء الله ماقصرت حتى الآن

أختنا الغالية دعيني ارحب بكـِ مره اخرى وأطرح الاسئله


بسم الله


سـ1/ لكل منا مطآلب بهذه الحياه التي يصفها البعض بالصعبه ‘ هل تحققت جميع مطالبك وماهي تلك المطالب التي تريدينها ؟



سـ2/لو واجهتي مشكله كبيره هل انتي من النوع الذي يحتفظ بمشاكله حتى تحليها بنفسك ام تستعينين بشخص؟


سـ3/ ماهي حكمتك بالحياه ؟



سـ4/ ماذا يعني لك منتدى الكرنك؟

سـ5/ باقة ورد لمن تهديها ...؟؟


سـ6/ شخص لاترفضى له طلبا ..؟؟

سـ7/ من هو توأم روحك ...؟؟

سـ8/ مالذي يشعرك بأكثر قدر من الحرج...

سـ9/ حمامة زاجل استقرت على نافذتك تحمل رسالة من مجهول فممن تتمنى ان تكون...؟؟ولماذا؟؟

وبعدين بقى
هوه انا لسه دورى موش بيجى ليه
وبعدين ؟

البدر كتب:

أهلا بأختنا الغالية عاليا

ملاك الرحمة حاليا

بس مش عارف ليه مع أنهم واحد أتعلقنا بعاليا لأنها عشرة (من العيش والملح مش رقم 10)

تحت امرك ياأستاذ بدر وحضرتك شوف احب الاسماء لك وتعامل بها معى
ولنا معاها مواضيع ومساهمات كتيرة

تحت امرك ياأستاذ بدر وحضرتك شوف احب الاسماء لك وتعامل بها معى ماعدتش تفرق
المهم أهلا بيكى على الكرسى وماشاء الله ماقصرت حتى الآن

أختنا الغالية دعيني ارحب بكـِ مره اخرى وأطرح الاسئله


بسم الله


سـ1/ لكل منا مطآلب بهذه الحياه التي يصفها البعض بالصعبه ‘ هل تحققت جميع مطالبك وماهي تلك المطالب التي تريدينها ؟

متطلبات الحياة لانهاية لها ولكن لايهمنى بها الان غير ان أرى اولادى فى صورة أفضل منى وان اساعدهم على تجاوز الاخطاء اللى فى يوم من الايام وقعت بها وان ربنا يكرمنا بالستر والصحة ويحسن خاتمتنا ان شاء الله .


سـ2/لو واجهتي مشكله كبيره هل انتي من النوع الذي يحتفظ بمشاكله حتى تحليها بنفسك ام تستعينين بشخص؟

مشاكل كتير مرت بحياتى واقرب مالى لايعلم به شئ وبحاول اصلاحها بنفسى اولا وفى بعض الاحيان بأخذ برأى صديقة ولكن الرأى بيكون مجرد تهدئة للموقف وليس حل وعندما افقدد القدرة للوصول لحل بتركها لله هو القادر وحده على حلها وفى وقتها

سـ3/ ماهي حكمتك بالحياه ؟

التجارب ليست لها نهاية والمرء منها فى زيادة
فعلا الحياة علمتنى كتير وكشفت وجوه كتير وعرفتنى ان مش كل البشر تحمل مااحمله والضمائر بتختلف من شخص الى اخر

سـ4/ ماذا يعني لك منتدى الكرنك؟

منتدى الكرنك ده سكنى وكل من فية فرد من عائلتى واخر مكان استقر اسمى به ولن اكرر اى تجارب واحاول الدخول بغيرة او اعرف احد من بعده حتى بعد مغادرتة فى اسوء الظروف.

سـ5/ باقة ورد لمن تهديها ...؟؟

أهديها لكل اسم بمنتدى الكرنك وبشكره على انضمامة لاسرتنا وان يسعد بوجوده معنا.

سـ6/ شخص لاترفضى له طلبا ..؟؟

أكيد أستاذ ماجد لان له معزة وانه عندما طلب منى الانضمام للمنتدى وافقت ووعدته ان استمر معه لغاية ماهو يقرر ويطلب منى المغادرة منه !

سـ7/ من هو توأم روحك ...؟؟

توأم روحى هو من لديه القدرة على قراءتى بشكل صحيح دون المساس بكرامتى او تجريحى او التلاعب بمشاعرى ولان توأمة حكتشف حقيقة مشاعرة وحنفصل عنه بهدوء .

سـ8/ مالذي يشعرك بأكثر قدر من الحرج...

هههههههههههه لما بكون فى مكان ماعرفش فيه حد واحاول اتقرب من الناس اللى فيه ولكن بفشل بس بحاول لغاية مالاقى الضحية اللى ممكن تعرفنى على باقى الناس .

سـ9/ حمامة زاجل استقرت على نافذتك تحمل رسالة من مجهول فممن تتمنى ان تكون...؟؟ولماذا؟؟

والله هنا فى السعودية مش بشوف الا الغربان السوداء بس يمكن يكون فى امل واشوف الحمام ده
اتمنى تكون الرسالة من القدر ومكتوب فيها ابشرى الدنيا خلاص فتحت ذراعيها لك وقررت تمنحك ضحكة منها !!!

بصي يا مدام عاليا
اولا معلش لتاخيري في الرد عليكي بس معلش انا كنت تعبان جدا وسخن وحالتي حالة بالاضافة للكلية واشرافي علي التدريب في المجمع الانتخابي بالحزب والشغل مع والدي

ثانيا انا مش اعرفك كويس لاني لسه عضو جديد معاكوا هنا في المنتدي ، ولا انتي تعرفيني كويس بس مش عارف ليه حاسس في اجاباتك انك انسانه مفيش عندك اللون الرمادي يعني يا ابيض يا اسود ، مش بتقبلي المساس بكرامتك ابدا ، انسانة تجيدي الرد بحزم مش عندك مرونة في الرد ممكن تزعلي كتير منك بالاسلوب العنيف واللي بايعها ده (انا اسف جدا بس ارجوكي استحملي بوختي للاخر )


ثانيا صدقيني في اسر للحب الاول يمكن انتي علشان انسانة مش بتقبلي المساس بكرامتك ممكن تكوني ضمرتي ذاكرتك من ناحية الجزء ده ، وعلشان هو مكنش بيحبك بجد انتي نسفتي الحب ده بكل حاجة ،


انا يمكن عمري صغير بس لفيت كتير جدا في حياتي وعرفت ناس وبقيت اعرف اشوف ولو جزء بسيط من طبيعة الناس اسمحيلي اقولك انتي الغربة غيرت فيكي حاجات كتيرة واثرت فيكي تاثير كبير اوي


ومعلش مرة تانية انا اسف اني بتكلم معاكي بحرية كبيرة بس احنا اخوات

وليا سوال او طلب ممكن تحكي لينا سفرك للسعودية او الانتقال للعيش فيها من امتي وليه وتكلمينا عن جوزك واولادك

وشكرا واســـــــــــــــــــــــــــــــــــــــف جدا

من اسئله الزملاء لكى عرفت شخصيتك الجميله

وحسيت اد ايه الغربه مؤلمه

ولى سؤال واحد

هل اتعوتى على السفر والبعد عن بلدك ولا بتفكرى ترجعى وتستقرى ؟